मलेसियामा जारी टी २० क्रिकेट शृंखला नेपालले जितेको छ । मलेसियासँगको ५ खेलको टी-२० क्रिकेट शृंखला नेपालले जितेको हो । 

घरेलु टोली मलेसियाले जितका लागि नेपाललाई दिएको ११० रनको लक्ष्य नेपालले खेल सकिन ४ बल बाँकी छँदा ७ विकेट गुमाएर भेट्टाएको थियो । पाँचौ तथा अन्तिम खेलमा मलेसियालाई ३ विकेटले हराउँदै नेपाले शृंखला ३-२ ले जितेको हो ।

पहिलो ब्याटिङ गरेको मलेसियाका लागि ओपनर वान जुलियाले ४७ रनको योगदान गरेकी थिइन् । उनले ६० बलको सामना गरी तीन चौका हिर्काउन सफल भएकी थिइन् । अर्की ओपनर विनिफ्रेड एनी दुराइसिंगमले २५ बलको सामना गरी २४ रन बनाउदै चार चौका हिर्काउन सफल भईन ।

वान जुलिया र विनिफ्रेड एनी दुराइसिंगमले ओपनिङ विकेटका लागि ३८ रनको साझेदारी गरे । चौथो नम्बरमा क्रिज समाल्न आएकी माहिराह इजाती इस्माइल ३१ बलमा एक चौकाको मद्दतले २० रन जोडन् सफल भएकी थिइन् । उक्त खेलमा घरेलु टिम मलेसियाले अतिरिक्त रुपमा १२ रन पाएको थियो ।

टी २० जित्न सफल नेपालको तर्फबाट बलर कविता जोशीले दुई र ईश्वरी बिष्टले एक विकेट लिन सफल भएका थिए ।