अदालतले बिस्फोट पुष्टि भएन, घरमा बम बिस्फोट भएको होइन, मृतकहरूलाई ईटाभट्टामा हालेर मारेको पुष्टि भएन भनेर उच्च अदालत वीरगञ्ज इजलासका न्यायाधीशद्वय डा. खुसीप्रसाद थारू र अर्जुन महर्जनले ज्यान मुद्दामा सफाइदिएपछि कांग्रेसका पूर्वसांसद मोहम्मद आफताब आलम छुटेका छन् । यो घटनालाई देशैभरि आश्चर्यजनक फैसला भनेर चर्चा भइरहेको छ भने यो मुद्दा सर्वोच्च पुग्ने भएको छ । २०६४ सालमा आलमको घरमा बम बिस्फोट भएको थियो, त्यो घटनामा संलग्नलाई ज्यूँदै इँटाभट्टामा पोलेको आरोपमा आलमलाई जिल्ला अदालत रौतहटले २०८१ वैशाखमा जन्मकैदको फैसला गरेको थियो । यो मुद्धाको फैसलालाई लिएर अधिवक्ता युवराज सफलले न्यायाधीशद्वयमाथि छानविन गर्न माग गर्दै न्यायपरिषदमा उजुरी गरेका छन् ।
जिल्ला अदालत रौतहटले पर्याप्त आधार देखेको भनिए पनि उच्च अदालत वीरगञ्जको इजलासमा सुनुवाई हुँदा अभियोग ठहर हुने कुनै आधार प्रमाणहरू नभेटिएकोले सफाइ दिएको भनिएको छ । यसकारण पनि न्यायाधीशद्वय बिबादमा तानिएका हुन्, यसको निरूपण सर्वोच्चबाट हुने कानुनविदहरू बताउँछन् । थुनामुक्त भएका आलम बिरामी भएकाले न्यूरो अस्पताल भर्ना गरिएका छन् ।
आलम माथिको आरोप–
संविधानसभाको निर्वाचन भोलि हुनेथियो । उनको घरमा बम बिस्फोट भयो । घाइतेहरू त्रिलोकप्रताप सिंह र ओशी अख्तर सहित घाइतेहरूलाई २०६४ साल चैत २७ गते साँझ राजपुरस्थित इँटा भट्टामा पोलेर हत्या गरेको आरोप लाग्यो । यो घटनाको १२ वर्षपछि आलम २०७६ असोज २६ गते पक्राउ परेर मुद्दा चलाइयो । यतिबेला चर्चामा छ– त्यतिबेला प्रहरीले घटनास्थलमा कुनै किसिमको बिस्फोट नभएको मुचुल्का बनाएको थियो । प्रहरी, जिल्ला सरकारी वकिल कार्यालय र पुनरावेदन सरकारी वकिल कार्यालयले मुद्दा नचल्ने राय दिएका थिए ।