नेपाली काँग्रेसको भ्रातृ संगठन नेपाल तरुण दलले अधिवेशनको मिति तोक्न जिल्ला कार्यसमितिहरुलाई निर्देशन दिएको छ । तरुण दलका अध्यक्ष विद्धान गुरुङले सम्पूर्ण जिल्ला कार्यसमिति अध्यक्षलाई परिपत्र गर्दै अधिवेशन मिति प्रस्ताव गरी केन्द्रबाट अनुमति लिन निर्देशन दिएका हुन् ।
‘वडा र पालिका अधिवेशन सम्पन्न भइसकेका जिल्लाहरुले प्रदेशसभा निर्वाचन क्षेत्र, संघीय निर्वाचन क्षेत्र र जिल्ला अधिवेशनका लागि मिति प्रस्ताव गरी दलको केन्द्रबाट अनुमति लिनुहोला,’ परिपत्रमा भनिएको छ ।
त्यस्तै, जिल्लामा वितरण गरिएका दलका पूर्ण सदस्यताको नामावली सदस्यता शुल्कसहित स्वीकृतिका लागि केन्द्रीय कार्यालयमा पठाउन तथा वडा तथा पालिकाको अधिवेशन सम्पन्न भएपछि प्रतिनिधिको नामावली अनुमोदनका लागि उपलब्ध गराउन पनि निर्देश गरिएको छ ।
