विभिध कारण चैत ५ गते स्थगित भएको काठमाडौंको अमृत साइन्स क्याम्पस र कास्कीको पृथ्वीनारायण (पीएन) क्याम्पसमा मतदान भइरहेको छ । आज बिहान साढे ६ बजेदेखि स्वतन्त्र विद्यार्थी युनियन (स्ववियु) चुनावको मतदान भइरहेको हो ।
यसअघि चैत ५ गते तय भएको निर्वाचन विवादका कारण स्थगित गरिएको थियो । अहिले लैनचरस्थित अमृत साइन्स क्याम्पस (अस्कल) मा शान्तिपूर्ण वातावरणमा मतदान भइरहेको क्याम्पस प्रमुख होमबहादुर बानियाँले जनाएका छन् ।
उक्त क्याम्पसमा ९ वटा बुथमा इलेक्ट्रोनिक मेसिनबाट मतदान भइरहेको र आजै साँझ नतिजा सार्वजनिक हुने बताइएको छ । त्यसैगरी पोखराको पृथ्वीनारायण क्याम्पसमा पनि शान्तिपूर्ण मतदान भइरहेको बताइएको छ ।
