आजबाट प्रेस चौतारी नेपालको १० औं महाधिवेशनको सुरु हुँदैछ । नेकपा एमाले निकट पत्रकारहरुको संगठन प्रेस चौतारी नेपालको १० औं महाधिवेशन विराटनगरमा सुरु हुन लागेको हो ।
आज चैत्र १० गतेदेखि तीन दिनसम्म चल्ने महाधिवेशनको उद्घाटन एमाले महासचिव शंखर पोखरेलले गर्ने तयारी रहेको छ । यसअघि प्रधानमन्त्री तथा नेकपा एमालेका अध्यक्ष केपी शर्मा ओलीद्वारा उद्घाटन गर्ने भनिए पनि ओली सहभागी नहुने भएपछि महासचिव पोखरेलले महाधिवेशनको उद्घाटन गर्न लागेको बताइएको छ ।
चौतारीको १० औं महाधिवेशनमा देशभरबाट ९ सय प्रतिनिधि विराटनगर आइपुगेको प्रेस चौतारीका सचिव विक्रम लुइटेलले जानकारी दिएका छन् । त्यस्तै चौतारीको नयाँ नेतृत्वका लागि वर्तमान उपाध्यक्ष गणेश पाण्डे र राजेश राईले उम्मेदवारी घोषणा गरिसकेका छन् ।
यसअघि अध्यक्ष ओलीले पाण्डेलाई अध्यक्ष बनाउन निर्देशन दिएपछि फागुन २८ गते सचिवमा मनोनीत भएका पाण्डेले चाैतारीकाे अध्यक्ष उठ्ने भन्दै दाेहाेराे जिम्मेवारीमा नरहने भनेर चैत ८ गते राजीनामा दिएका थिए । केन्द्रीय नेतृत्वले सर्वसम्मत नेतृत्व छान्न निर्देशन दिएपनि महाधिवेशन प्रतिनिधि भने निर्वाचन मार्फत नेतृत्व छान्ने पक्षमा देखिएका छन् ।
