फागुन २५ गते पूर्वराजालाई स्वागत गर्न एयरपोर्टदेखि महाराजगञ्जसम्म जनलहर देखिएपछि फुर्केका राजतन्त्र र हिन्दुवादीहरूमा फेरि अहंकार चढेको छ ।
दुर्गा प्रसाई मपाईंवादी बनेका छन् भने राजेन्द्र लिङ्देन र कमल थापा मात्र होइन, अन्य धर्मभिरू व्यक्ति, राजतन्त्र र हिन्दुवादी संगठनका व्यक्तिहरू पनि राजा पुनस्र्थापित हुन्छ भन्छन् तर एकढिक्का हुनुको साटो आफू आफूवीच नै तीब्र मतभेद प्रकट गरेर सामाजिक सञ्जालमा आफूलाई शक्तिशाली देखाउने होडबाजी गरिरहेका छन् । यो अहंकार र आफूवीचको बिग्रहले फेरि अर्को १९ वर्ष राजतन्त्रलाई फर्कन नदिने खतरा बढ्नसक्ने बहस चर्किएको छ ।
फागुन ७ गते राजाले आफूलाई साथ दिन र देशको अस्तित्व बचाउन गरेको आह्वानको नतिजा थियो फागुन २५ गतेको जनस्वागत । केही दिनभित्रै राजधानीमा राजाको अभिनन्दन गरेर जनताले नै राजालाई राजदरवार फर्काउने तैयारी चलिरहेका बेलामा राजतन्त्र र हिन्दवादीहरूवीच छेड हानाहान गर्ने, आफैले जस लिएर एकदोस्रामा गालीगलौज गर्नाले असंगठित तर राजा आउ देश बचाउ भनेर सडकमा उत्रिएका जनताको एकतामा समेत भाँजो बनेको छ ।
जबसम्म राजतन्त्रवादी र हिन्दुवादीपार्टी, व्यक्ति, समूहहरू देशमा अभिभावकत्व स्थापित गर्न उकदोस्रालाई स्वीकार गर्न सक्दैनन्, तवसम्म यिनले राजा मान्नु र आफू आफूलाई नमान्नुले यिनको लक्ष्य कहिले पुरा हुने देखिदैन । अर्थात् गणतन्त्र र लोकतन्त्रलाई लुटतन्त्र बनाउनेहरूको राइँदाइँ चलिरहनेछ ।
मुख्यता राप्रपा, राप्रपा नेपाल, ‘राष्ट्र, राष्ट्रियता, धर्म संस्कृति र नागरिक बचाउ महाअभियान नेपाल’, यी तिनै शक्तिवीच मतभेद बढेको छ, मनभेद बढेको छ । यिनकावीच राजाको विश्वासिलो बन्ने होडबाजीले फेरि बिडमात्र तातेको हो कि भन्ने शंका बढी उठेको सुनिन्छ ।
एकपल्ट सामुहिक बैठकसमेत नगरी आ–आफ्नै हिसावले राजाको स्वागत गर्न जाँदा स्वस्फूर्त रूपमा अपार नागरिक, त्यसमा पनि युवाजमात बढी सहभागी भएपछि फागुन २५ को स्वागत विश्वसमाचार बनेको थियो । यसकारण ०६३ सालका शक्तिहरू र वर्तमान सत्ता, संसदमा समेत बहसको विषय बन्यो ।
आश्चर्य त के छ भने राजतन्त्र फर्काउन चाहनेहरूवीच हार्दिकता देखिदैन, एजेण्डा पनि स्पष्ट छैन । अहिलेको बहस छ– राजासहितको प्रजातन्त्र कि यही यस्तै गणतन्त्र ? आमनागरिक वर्तमान नीति, नेतृत्व, सरकार, संसदसँग आक्रोसित छन् ।
अब प्रश्न छ, २०७९ फागुनमा राजालाई राखेर दुर्गा प्रसाईंले सुरू गरेको महाअभियान, राप्रपा, राप्रपा नेपाल, अन्य राजतन्त्र र हिन्दुवादीको वीच एकता हुन्छ कि बिमतीमा परास्त हुनेछन् ?
