बुटवल हुँदै धनगडी पुगेर आमसभामा बोल्दै राप्रपा अध्यक्ष राजेन्द्र अब लिङदेनले भनेका छन्– अब बिकल्प खोज्ने बेला आयो । तैयार हुनुपर्छ ।
अध्यक्ष राजेन्द्रले कांग्रेस र कम्युनिष्टले देशलाई बर्बाद पारेको आरोप लगाएका छन् । यसकारण यो व्यवस्था र यी नेतालाई देशले धान्न सक्दैन । राष्ट्रिय प्रजातन्त्र पार्टीले आयोजना गरेको बिरोध सभामा राप्रपाका नेताहरूले  कांग्रेस– कम्युनिष्टको विकल्पका लागि राप्रपा तैयार रहेको जनाउ दिएका छन् ।
कांग्रेस र कम्युनिष्टबाट देश बन्छ भन्ने भ्रममा नबस्नुहोला भन्दै राप्रपाका नेताहरूले जनतासँग मौका दिन आग्रह गरेका छन् । राप्रपाले जनतासँग भनेको छ– अभिभावकको रूपमा राजालाई राखौं, जनताबाट प्रत्यक्ष निर्वाचित कार्यकारी प्रधानमन्त्रीसहितको ब्यबस्था लागू गरौं । चाँडोभन्दा चाँडो यस्तो ब्यबस्था लागू गर्न सकिएन भने देश अझै बर्बाद हुँदै जानेछ । जनता पनि भ्रष्टाचार र अनैतिकता, अपराधी बचाउने कानुन निर्माण गर्नेहरूले चलाएको सरकार असफल भइसक्यो, यिनीहरूबाट देश बन्दैन, आश नगरौं । युवा निकासी गरेर देश चलाउनु अपराध हो ।
धनगडीमा आयोजित विरोध सभामा राप्रपाका नेता डा. प्रकाशचन्द्र लोहनीले काण्डै काण्डका नाइकेहरू कसरी अग्रगमनकारी हुन सक्छन् ? भन्ने प्रश्न गरेका थिए भने सभामा राप्रपाका दर्जनभन्दा बढी राप्रपाका केन्द्रीय नेताहरूले मन्तब्य राखेका थिए । प्रत्येक राप्रपा नेताहरूले सत्तारूढ कांग्रेस एमालेको बिरोध गरेका थिए ।
धनगडीमा आयोजित आमसभामा काठमाडौं, बुटवल, नेपालगञ्ज, कैलाली–कञ्चनपुरका विभिन्न ठाउँबाट राप्रपाका नेता तथा कार्यकर्ताको ठूलो संख्यामा जम्मा सहभागिता रहेको थियो । तथापि विश्लेषकहरूको मत छ– राप्रपा मेरूदण्ड नभएको पार्टी हो । बिरोधका लागि विरोध गर्न जानेको छ, मौसमी आमसभा र आन्दोलन पनि गर्छ तर राजतन्त्र, हिन्दुवाद र राष्ट्रवादीहरूलाई एकतावद्ध पारेर जनविद्रोहमा जान र आफ्नो राजतन्त्रसहितको पद्धति स्थापनाका लागि अग्रसरता देखाउन सक्दैन । आलोचकहरू त राप्रपालाई गफाडीहरूको पार्टी समेत भन्न थालेका छन् ।
राजतन्त्रकै का“धमा पुर्षाको भार
जनताले परिवर्तन खोजेकै हुन् भने जनताको नासो जनतालाई नै बुझाएर जिम्मेवारीबाट पन्छिएका ज्ञानेन्द्र शाहले देश र जनताको हार गुहार सुनेर पटक पटक चिन्ता र चासो देखाइरहेका थिए । आफ्नो चिन्ता र चासो तथा सहमति र सहकार्य गरेर देशमा आइपरेका समस्या समाधान र स्थिरताका लागि मिलेर अघि बढ्न गरेको आग्रहलाई समेत राजनीतिक दलहरूले बेवास्ता गर्दैआएका छन् ।
अति भएपछि गत फागुन ७ गते पुन मेलमिलाप र सहकार्य गर्नका लागि पूर्वराजाले सन्देश दिनुभएको छ । यो सन्देशले देशभित्र र बाह्य जगतमा समेत तरङ्ग उत्पन्न भएको छ । यतिबेला नेपालमा संघीय लोकतान्त्रिक गणतन्त्रको असफलता र राजतन्त्रको आवश्यकताबारे चर्चा चुलिएको स्थिति छ ।
राजधानीभित्रका भक्तपुर, ललितपुर राजधानीबाहिरका अनेक जिल्ला क्षेत्रहरूमा राजाको अभिनन्दन गर्दै राजतन्त्र जिन्दावादका नारा लागिरहेका छन् । राजाआउ देश बचाउको माग भइरहेको छ ।
पूर्वराजाभन्दा लोकप्रिय कुनै नेता छैनन् । राजतन्त्रभन्दा लोकप्रिय गणतन्त्र हुनसकेन । नीति, नैतिकता, चरित्र र सिद्धान्त केही पनि बाँकी नरहँदा लोकतन्त्र लज्जित भएको छ । अब लोक निर्णय आउनेवाला छ ।
२० वर्षका गोरखाका राजा पृथ्वीनारायण शाहले गरेको  एकीकरण अभियानमा १७ हजार मान्छे मरे कि मरेनन्, १० वर्षको जनयुद्धमा रगतको खोलो नै बगायो । पीडितले संक्रमणकालीन न्याय पाउन सकेनन् । पीडकले राज्यको लाभ लिइनै रहे । २९ वर्षका जंगबहादुरले कोतपर्व मच्चाएर सत्ता र शक्ति आर्जन गरे । उनलाई पनि जनताले नै किनारा लगाइदिएका हुन् । समष्टिमा हेर्दा नेपालको इतिहास भनेको खुकुरीकै इतिहास हो र २१औं शताब्दीको नेपालमा अहिले पनि खुकुरीकै बलमा सत्ता कब्जा गर्ने प्रचलन जारी नै छ । कांग्रेस र एमालेलगायतका प्रतिपक्षीले जतिसुकै प्रजातन्त्रको शंख फुके पनि पद्धति अपराधमै उभिएको देखिन्छ । लोकतन्त्र आयो, कोही लोकतान्त्रिक मर्यादामा बस्न चाहेनन् । कांग्रेस, एमाले, माओवादी स्वार्थका लागि जस्तोसुकै निर्णय गर्न अग्रसर छन् । राष्ट्र अस्तित्वको संकटमा छ । यसकारण हरेक नागरिक भन्छन्– मिसन राजतन्त्र, समय आयो राजतन्त्र पुनस्र्थापनाको ।