महेन्द्र मोरङ क्याम्पसमा नेपाली कांग्रेसनिकट विद्यार्थी संगठन नेपाल विद्यार्थी संघको दुई पक्षबीच झडप भएको छ । विराटनगरस्थित उक्त क्याम्पसमा आज भएकाे झडपमा दुईजना विद्यार्थी घाइते भएका हुन् ।
क्याम्पस परिसरमा नेविसंघ मोरङका सभापति सरोज पोखरेल र चुले भाइ भनिने आयुष दाहाल सहितको टोली क्याम्पस इकाइ गठन गर्न भन्दै क्याम्पस पुगेका थिए । उक्त क्याम्पसमा आफूहरुको स्वीकृतिबिना इकाइ कमिटी गठन गर्न लागेको भन्दै विवाद सुरू भएकाे थियाे ।
विवाद सुरू भएपछि स्ववियु सभापतिसमेत रहेका देउवा समूहका जसवन्त पौडेलको समूहले बञ्चरो, तरबार र लाठी प्रहार गरेको अर्को पक्षको आरोप रहेकाे छ । यता इकाइ गठन गर्न पुगेका सरोज पोखरेल कोइराला पक्षका हुन् ।
उनीहरूबीचको झडपमा परेर नेविसंघ सभापति पोखरेल र आयुष दाहाल घाइते भएकाे र उनीहरुको विराटनगरस्थित नोबेल मेडिकल कलेजमा उपचार भइरहेको बताइएकाे छ । सामाजिक संजालकाे भिडियाेमा एकाअर्काबीच हानाहान भएकाे र एकजनाले बन्चरो बोकेर कुदिरहेको दृश्य देख्न सकिन्छ भने घटनाबारे अनुसन्धान भइरहेको प्रहरीले जनाएको छ ।
