ताप्लेजुङको पाथीभरा (मुक्कुमलुङ) क्षेत्रमा केबुलकार बनाउनुपर्छ, बनाउनु हुन्न भन्ने विवाद सडकदेखि संसदसम्म चर्कै उठेको छ । पाथीभरा क्षेत्रमा राज्यदमन भएको छ, जनता र सुरक्षाकर्मीवीच भिडन्त भइरहेको छ । केबुलकार पाथीभरा क्षेत्रमा बन्दैछ, पक्ष विपक्ष देशैभरि विभाजित भएर उठेका छन् ।
जो पदमा छन्, पार्टीका निकट छन्, उनीहरू बन्नुपर्छ भन्नेमा र आमनागरिकले गठन गरेको ‘नो केबुलकार समूह’ विपक्षमा छन, सत्तापक्षले नो केबुलकार भन्ने जतिलाई सुरक्षाकर्मी लगाएर दमन गरिरहेको छ । यो विवादबाट ठूलै समस्या सिर्जना हुनसक्ने खतरा देखिएको छ । दिनदिनैको भिडन्तमा प्रहरी र आमनागरिक पक्षमा गम्भीर घाइते हुनेको संख्या बढेको छ । धनजनको खती हुने खतरा छ ।
वार्ता र छलफल भएका छन्, राज्यपक्षको ढिपीले निष्कर्ष निस्केको छैन । माघ २२ मा नो केबुलकार पक्ष र सरकारवीचको मुक्कुम्लुङ (पाथीभरा) मा निर्माणाधीन केबुलकारको माथिल्लो स्टेसनको निर्माण कार्य तत्कालका लागि स्थगित गर्ने सहित विभिन्न ६ बुँदे सहमति भएकोमा हाल त्यो सहमति पनि तोडिएको अवस्था छ ।
मुक्कुमलुङ – पाथीभरामा आन्दोलनरत स्थानीय नागरिकहरूमाथि राज्यले गरेको दमनका शृङ्खलाहरू देख्दा राज्य लोकतान्त्रिक होइन रहेछ भन्नुपर्ने भएको छ ।