![एमाले अध्यक्ष ओलीले आज शपथ लिने](/_next/image?url=https%3A%2F%2Fwww.nepaltoday.com.np%2Fbackend%2Fuploads%2Foli_6b8d04cb8c.jpg&w=3840&q=75)
हिँजाे असार ३० गते प्रधानमन्त्रीमा नियुक्त भएका नेकपा एमालेका अध्यक्ष केपी शर्मा ओलीले आज पद तथा गोपनीयताको शपथ लिने कार्यक्रम रहेकाे छ । प्रतिनिधिसभाको सबैभन्दा ठूलो दल नेपाली कांग्रेसको समर्थनमा राष्ट्रपति रामचन्द्र पौडेलबाट एमाले अध्यक्ष ओली प्रधानमन्त्रीमा नियुक्त भएका थिए ।
आज बिहान ११ बजे राष्ट्रपति रामचन्द्र पौडेलसमक्ष शीतल निवासमा आयोजना हुने विशेष समारोहमा नवनियुक्त प्रधानमन्त्री ओलीले पद तथा गोपनीयताको शपथ लिने कार्यक्रम तय भएकाे छ । शपथ पछि प्रधानमन्त्री ओलीबाट आजै मन्त्रिपरिषद्को विस्तार गरि नवनियुक्त मन्त्रीहरूले पनि शपथ लिने बताइएकाे छ ।
नवनियुक्त प्रधानमन्त्री ओलीकाे नेतृत्वमा नेपाली काँग्रेसका ९ र नेकपमा एमालेका तर्फबाट ८ जना मन्त्री बन्ने सहमति भएकाे छ । जसअनुसार नेकपा एमालेका तर्फबाट मन्त्री बन्ने ८ जनाको नाम टुंगो लागेको छ । एमालेले विष्णु पौडेल, पृथ्वी सुब्बा गुरुङ, छविलाल विश्वकर्मा, योगेश भट्टराई, कृष्ण गोपाल श्रेष्ठ, जुली महतो, विद्या भट्टराई र दामोदर भण्डारीलाई मन्त्री बनाउने निर्णय गरेकाे छ ।
यता नेपाली कांग्रेसका नेताहरु मन्त्रीहरुको नाम अन्तिम टुंगो लगाउने छलफलमा जुटेकाे बताइएकाे छ । प्रधानमन्त्री ओली नेतृत्वकाे सरकारमा पार्टीकाे पूर्व महामन्त्री प्रकाशमान सिंहकाे नेतृत्वमा कांग्रेस सरकारमा सहभागि हुने तयारी रहेकाे र पार्टी सभापति शेरबहादुर देउवाले आफ्नो निकट नेताहरुसँग छलफल गरेपछि मन्त्रीहरुको अन्तिम सूची तयार हुने बताइएकाे छ ।