राष्ट्रिय सभाको अध्यक्ष गणेश तिमल्सिनाको पदावधि सकिएसंगै खालि भएको राष्ट्रिय सभा अध्यक्ष पदका लागि उम्मेदवार तय गर्न नेकपा माओवादी केन्द्रको पदाधिकारी बैठक बस्दैछ । मंगलबार हुने राष्ट्रिय सभा अध्यक्षको उम्मेदवार तय गर्न आजको पदाधिकारी बैठक बस्न लागेको हो ।
हिजो बसेको पार्टी संसदीय दलको बैठकमा पार्टी अध्यक्ष तथा प्रधानमन्त्री पुष्पकमल दाहाल प्रचण्डले राष्ट्रिय सभा अध्यक्षको उम्मेदवार आइतबार टुंगो लगाउने बताएसंगै आज बैठक बस्न लागेको हो । राष्ट्रिय सभा अध्यक्षको उम्मेदवारमा हालकी उपसभामुख उर्मिला अर्याल, झक्कुप्रसाद सुवेदी र नारायण दाहाल दाबेदार रहेको बताईएको छ ।
नयाँ सत्ता गठबन्धनले यसअघि गरेको सहमति अनुसार राष्ट्रिय सभा अध्यक्ष माओवादी केन्द्रलाई र उपाध्यक्ष एमालेलाई दिने निर्णय भएको थियो । नेपाली कांग्रेससंगको सत्ता गठबन्धन टुटेपछि अहिले प्रधानमन्त्री पुष्पकमल दाहाल प्रचण्डको नेतृत्वमा नेकपा एमाले, राष्ट्रिय स्वतन्त्र पार्टी, नेकपा एस र जसपाको नयाँ मन्त्रीमण्डल पुनर्गठन भएको छ ।
