पुस २७ गते ३०२ औँ पृथ्वीजयन्ती तथा राष्ट्रिय एकता दिवसको अवसर पारेर राष्ट्रिय प्रजातन्त्र पार्टी (राप्रपा)ले एक कार्यक्रम आयोजणा गर्ने भएको छ । राप्रपाले राजधानी काठमाडौँको भृकुटीमण्डपमा शुभकामना आदानप्रदान तथा चियापान कार्यक्रम आयोजना गर्ने भएको हो ।
राप्रपाको उक्त कार्यक्रममा प्रधानमन्त्री, मन्त्रीहरू, विभिन्न राजनीतिक दलका नेता, कूटनीतिक तथा संवैधानिक निकायका प्रतिनिधि, धार्मिक संघसंगठन, उद्योगी, व्यवसायी, विभिन्न पेशाकर्मी, बुद्धिजीवी लगायत आठ हजारलाई निमन्त्रणा गरिएको छ । त्यसैगरी राप्रपाले सोहि दिन सिंहदरबारस्थित पृथ्वीनारायणको शालिकमा माल्यार्पण गर्ने कार्यक्रम समेत रहेको बताईएको छ ।
विभिन्न राज्यलाई एकीकृत गरी आधुनिक नेपाल निर्माणमा योगदान गरेका राष्ट्र निर्माताको सम्मानमा अध्यक्ष राजेन्द्र लिङ्देनको नेतृत्वमा भद्रकाली हॅुदै सिंहदरबार अगाडि रहेको पृथ्वी शालिकसम्म ऱ्याली र शालिकमा माल्यार्पण हुने र भृकुटीमण्डपमा भेला भइ चियापान समारोहमा विशिष्ट व्यक्तिहरू सहभागी हुने पार्टी प्रवक्ता एवं प्रचार विभाग प्रमुख मोहन श्रेष्ठले जानकारी दिएका छन् ।
प्रवक्ता श्रेष्ठका अनुसार पार्टीले राष्ट्रिय एकता दिवसका रुपमा केन्द्र, प्रदेश र स्थानीय तहमा पृथ्वीनारायण शाहको व्यक्तित्व तथा इतिहास झल्काउने गरी सभा गोष्ठी, शुभकामना आदानप्रदान तथा चियापान समारोह, अन्तक्र्रिया, दिपावलीलगायत कार्यक्रम गरी उत्सवका रुपमा मनाउन पार्टी मातहतका सबैलाई सर्कुलर गरिएको बताईएको छ । पार्टीले जिल्लामा हुने कार्यक्रमलाई प्रभावकारी बनाउन केन्द्रीय प्रतिनिधिलाई जिल्ला-जिल्लामा खटाइएको पनि उनको भनाई छ ।
पृथ्वीजयन्ती तथा राष्ट्रिय एकता दिवसको अवसरमा ‘पृथ्वीनारायण’ शीर्षकमा कविता लेखन प्रतियोगिताको नतिजा प्रकाशन गरी पहिलो, दोस्रो र तेस्रोलाई क्रमशः एक लाख, ५० हजार र २५ हजार रुपैयाँ तथा सान्त्वना विजेता तीन जनालाई प्रतिव्यक्ति १० हजार रुपैयाँ पुरस्कार प्रदान गरिनेछ । साथै पार्टी अध्यक्ष राजेन्द्र लिङ्देनको नेतृत्वमा देशभर पृथ्वीजयन्तीलाई एकता दिवस उत्सवका रूपमा मनाउन मूल समारोह समिति समेत गठन गरिएको बताईएको छ ।
