नक्कली भुटानी शरणार्थी प्रकरणमा दोषी ठहर भई केन्द्रीय कारागारमा रहेका तीन जनालाई उच्च अदालतले धरौटीमा छाड्न आदेश दिए पनि उनीहरुलाई सम्पत्ति शुद्धीकरण विभागमा बुझाउन लागिएको छ । उच्च अदालतले धरौटीमा छाड्न आदेश दिएर धरौटी रकम बुझाए पनि उनीहरुलाई सम्पत्ति शुद्धीकरण विभागमा बुझाउन लागिएको हो ।
आइतबार नरेन्द्र केसी र शमशेर मियाँ र हरिभक्त महर्जन सहित धरौटी बुझाएका तीन जना र साधारण तारेखमा छाड्न आदेश भएका आषिश बुढाथोकी गरि ४ जनालाई सम्पत्ति शुद्धीकरण विभागमै बुझाउने तयारी रहेको केन्द्रीय कारागार प्रशासनले जानकारी दिएको छ ।
उच्च अदालत पाटनले शुक्रबार धरौटीमा छाड्न आदेश दिए पनि केन्द्रीय कारागारमा रहेका तत्कालीन गृहमन्त्री खाँणका स्वकीय सचिव नरेन्द्र केसी, हज कमिटीका अध्यक्ष शमशेर मियाँ र हरिभक्त महर्जनले आइतबार धरौटी बुझाए पनि रिहा भएका छैनन् ।
आइतबार नरेन्द्र केसी र शमशेर मियाँले १०/१० लाख रुपैयाँ र हरिभक्त महर्जनले १५ लाख रुपैयाँ बुझाएका थिए । तर, उनीहरूमाथि अख्तियार दुरुपयोग अनुसन्धान आयोग र सम्पत्ति शुद्धीकरण अनुसन्धान विभागले पनि अनुसन्धान गरिरहेकाले आइतबार रिहा नगरिएको र सोमबार उनीहरु तीनै जनालाई सम्पत्ति शुद्धीकरण अनुसन्धान विभागमा बुझाउन लागिएको बताईएको छ ।
