सरकारले ल्याउन लागेको खुला कारागारको अवधारणा अन्तर्गत पहिलो चरणमा झन्डै दुई हजार कैदीले जेलबाहिर बस्ने सुविधा पाउने भएका छन् ।
समय समयमा कारागारमै उपस्थित हुनुपर्ने गरी जेल बाहिर बसेर कैद भुक्तान गर्न सक्ने गरी कार्यविधि बनेको र सोहि अनुसार कैदीले जेलबाहिर बस्ने सुविधा पाउने भएका हुन् ।
गृह मन्त्रालयका सहसचिव नारायणप्रसाद भट्टराईका अनुसार खुला कारागार व्यवस्थापन कार्यसञ्चालन कार्यविधि बनेर कार्यान्वयनको चरणमा पुगेको बताईएको छ ।
प्रतिनिधि सभाको कानुन, न्याय तथा मानव अधिकार समितिको बैठकमा सहसचिव भट्टराईले ‘पहिलो चरणमा दुई हजार कैदीले उक्त सुविधा पाउँने बताए ।
एक वर्षभन्दा बढी कैद सजाय पाई कैद सजायको दुई तिहाइ अवधि भुक्तान गरिसकेको र राम्रो आचरण भएको कसुरदारले यस्तो सुविधा पाउँने उनको भनाई थियो ।
जन्मकैद, भ्रष्टाचार, जबर्जस्ती करणी, तेजाब आक्रमण, मानव बेचबिखन, संगठित अपराध, सम्पत्ति शुद्धीकरण, यातना, मानवताविरुद्धको अपराधजस्ता नकारात्मक सूचीका अपराधमा संलग्न कसुरदारले भने उक्त सुविधा पाउने छैनन् ।