लामो समय झापामा बसेर पूर्वाञ्चलवासीसँग अन्तरक्रिया, भेलामा सहभागी हुँदै नागरिक अभिनन्दनसमेत ग्रहण गरेर २०६५ सालपछि पहिलोपल्ट अभिनन्दन समारोहलाई संवोधन समेत गरेर राष्ट्रप्रतिको चिन्ता जाहेर गरेका पूर्वराजा अब मध्य, सुदूरपश्चिम र कर्णालीक्षेत्रका केही जिल्लाको भ्रमणमा निस्कन लागेको समाचार छ ।
२०८० वैशाख ८ गतेको मितिमा डा.फणिराज पाठकले जारी गरेको सूचनामा लेखिएको छ– श्री ५ महाराजाधिराज ज्ञानेन्द्र वीर विक्रम शाहदेव तथा श्री ५ बडामहारानी कोमल राज्यलक्ष्मी देवी शाह मध्यपश्चिम, सुदूरपश्चिम र कर्णाली क्षेत्रको केही जिल्लाहरुको भ्रमणको सिलसिलामा आगामी हप्ता नेपालगञ्ज सवारी होइबक्सदैछ ।
अर्थात् यो सूचनापछि राजनीतिक वृत्तमा अब पूर्वराजा देशको दुरावस्थालाई टुलुटुलु हेरेर नबस्ने मूडमा पुगेको अर्थ लगाइएको छ । प्रधानमन्त्री स्वयम्ले केही दिन अघि यो व्यवस्था उल्टिन सक्ने खतरा देखेको अभिव्यक्ति दिनु र पूर्वराजा यसरी सक्रिय रुपमा देशका विभिन्न भागमा जनतासँग प्रत्यक्ष अन्तरक्रियामा निस्कनु भनेको अर्को परिवर्तनको संकेतका रुपमा परिभाषित गर्न थालिएको छ ।
कोरोनाअघिका समयमा पूर्वराजा यसरी भ्रमणमा निस्कदा शक्तिपीठको पूजापाठ भनेर निस्कने गरेको इतिहास छ । तर यसपल्ट केही जिल्लाहरुको भ्रमणको सिलसिलामात्र भनिनुले १६ वर्षसम्म जुन तरिकाले नेतृत्व वर्गबाट देश र जनताको शोषण र दोहन भयो, जनतामा असन्तुष्टि चुलिएको छ, अब यसरी चल्दैन भन्ने सन्देशसमेत यो भ्रमणले दिने र आमनागरिक अभिभावकविहीन छैनन् भन्ने प्रमाणितसमेत हुने अवस्था सिर्जना भएको छ । सम्भवतः यहीकारण मध्य, सुदूरपश्चिम र कर्णालीका विभिन्न जिल्लाबाट पूर्वराजाको भ्रमणका लागि आमन्त्रण आउन थालेको र अभिनन्दन गर्नका लागि हिन्दु र राजसंस्थावादी सलबलाउन थालेको खबर छ ।