काठमाडौं । राजनीति गर्नेहरुले सडकबाट अदालतलाई धम्क्याए । जो विधिको शासन, विधिको शासन भनिरहेका छन्, तिनीहरु नै संसद पुनस्र्थापना नभएमा... भनेर दाह्रा किटिरहेका छन्, नङ्ग्रा देखाइरहेका छन् । व्यक्ति बिरोधीहरु सबै क्रान्तिकारी, सबै चर्का भाषण गरिरहेका छन् ।
यहाँसम्म कि संविधानविदहरुसमेत दुई खेमामा बाँडिएका छन्, राजनीति गरिरहेका देखिन्छन् । कस्तो अचम्मको देश, नेता उच्छृङ्गल भए, कानुनविदहरु पनि कम देखिएनन् ।
दमन ढुंगाना, पूर्वसभामुखले भनेका छन्– प्रतिनिधिसभा बिघटन प्रतिगामी कदम हो । त्यस्तो कदमलाई सदर गर्ने हो भने संविधान खारेजीको फैसला एकसाथ गरे हुन्छ । यो हद नाघेको चर्को क्रान्तिकारी कुरा गर्नुभएको छ कानुनविद दमननाथ ढुंगानाले । सभ्य भाषा त कसैले बोल्नै छाडे ।
संविधानसभाका सदस्यहरुको मञ्चदेखि सडकसम्म उभिएर चर्का भाषण गर्ने दमन ढुंगाना भन्नुहुन्छ– संवैधानिक रुपमा हेर्दा संसद पुनस्र्थापनाको विकल्प छैन, राजनीतिक रुपमा हेर्दा के हुन्छ भन्न सकिन्न । संविधान भनेको राजनीतिक दस्तावेज हो । अहिलेको मुद्धा राजनीतिक मुद्दा पनि हो । हे श्रीमान ! तपाईहरुको फैसलालाई हामी अन्यथा भन्न सक्दैनौं, शिरोपर गर्छौं । यो प्रतिनिधिसभा विघटनलाई मात्र सदर गर्ने होइन, संविधान पनि बदर गरिदिनुस् । किनभने यो संविधानसभामाथि प्रहार हो, संविधानमाथि प्रहार हो, प्रतिगमन नै हो । त्यस्तो होस म भन्दिनँ । सडकबाट न्यायाधीश तान्ने दिन आउनसक्छ, हामीले संसारमा देखेका छौं । फिलिपिन्समा त म पुगेकै बेला त्यस्तो भएको छ ।
यो हदमा न्यायाधीशलाई तर्साउन मिल्छ कि मिल्दैन ?