चुरे संरक्षणलाई मधेश सरकारले प्राथमिकतामा राख्नुपर्छ : नेता मिश्र

काठमाडौं । मधेश मरुभूमिकरण हुन लागेको भन्दै नेपाली कांग्रेसका नेता मनिष कुमार मिश्रले मधेश प्रदेश सरकारले चुरे संरक्षणलाई प्राथमिकतामा राख्न माग गरेका छन् ।
मधेशमा दिनप्रति दिन जल संकट गहिरिँदै गएकोप्रति चिन्ता व्यक्त गर्दै नेता मिश्रले चुरे बचाउन मधेश प्रदेश सरकारसँग आग्रह गरेका हुन् ।
उनले हालको मधेशको अवस्थालाई पुरानो हराभरा, उर्बरा तथा जलाशययुक्त बनाउन चुरे क्षेत्र संरक्षण गर्न अति आवश्यक रहेको कुरामा जोड दिएका छन् ।
उनले भनेका छन्, ‘एकताका मधेशको अन्नबाली नेपाललाई पुगी विदेशसम्म आयात गरेको कैयौ उदाहरणहरू छन् । तसर्थ मधेश प्रदेश सरकारले चुरे संरक्षणलाई प्राथमिकतामा राख्न अति आवश्यक छ ।’
उनले केही कुराहरू गर्नै पर्ने भन्दै अवैध वा बिनामापदण्डको उत्खनन् रोक्ने, पानी धेरै शोषने विरूवा पूर्णरूपेण बन्देज लगाउने जस्तै सपेता आदी, निरन्तर बिक्षारोपणमा ध्यान दिने, पुराना पानीको मुहानहरूलाई सक्रिय बनाउने सुझाव दिए ।
‘यी र यस्ता धेरै उपायहरू छन् जसले गर्दा सिचाई, खानेपानी, खेतको उर्बरा शक्ति, वनजंगल, हावापानी सम्पूर्णलाई स्वच्छ राख्न मद्दत पुग्छ र पानीको अकाल, भोकमरी, खेतीप्रतिको बितृष्णा, अस्वस्थता आदी हटेर जानेछ,’ उनले भनेका छन् ।