फागुन २१ गते हुन लागेकाे प्रतिनिधिसभा निर्वाचन आउन एक हप्ता मात्रै बाँकी रहेकाे बेला नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवा सिंगापुर गएका छन् । यसपटकको चुनावी प्रक्रियाबाटै बाहिरिएका देउवा ‘स्वास्थ्य उपचार’को कारण देखाउँदै सिंगापुर पुगेका हुन् ।
पार्टीभित्रको आन्तरिक कलह र नयाँ नेतृत्वसँगको असन्तुष्टिका कारण चुनावी प्रक्रियाबाटै बाहिरिएका देउवा बुधबार बेलुकी साढे ११ बजेको सिंगापुर एयरलाइन्सको उडानमार्फत त्यसतर्फ प्रस्थान गरेका हुन् । नियमित फलोअप र उपचारका लागि यसअघि पनि बेलाबेलाम सिंगापुर गइरहने देउवाको यसपटकको यात्रालाई भने राजनीतिक वृत्तमा ‘चुनाव छल्ने रणनीति’का रूपमा हेरिएको बताइएकाे छ ।
यहि फागुन २१ गते हुन गइरहेको प्रतिनिधि सभा निर्वाचनमा यसपटक उम्मेदवारी नदिएका देउवा कांग्रेसको विशेष महाधिवेशनबाट गगन थापा सभापति बनेपछि पार्टीको नेतृत्वबाट अपदस्थ बनेका थिए । वर्तमान संस्थापन पक्षले टिकट नदिएपछि २०४८ सालयता डडेल्धुराबाट लगातार ७ पटक अपराजित देउवा यसपटक चुनावी मैदानबाट बाहिर छन् ।
देउवाले निरन्तर जित्दै आएकाे डडेल्धुरामा अहिले उनको सट्टा युवा नेता नैनसिंह महरले टिकट पाएका छन् । पछिल्लो समय ‘बदलिएको कांग्रेस’ को नारा दिइरहेको वर्तमान संस्थापन पक्षले देउवालाई चुनावी अभियानमा सहभागी गराउन वा रुख चिह्नमा भोट माग्न आग्रह गरेपनि खासै चासाे दखाएका थिएनन् ।
