हरेक वर्ष झैं यसवर्ष पनि डिसेम्बर २५ को दिन आज विश्वभरका इसाई धर्मावलम्बीहरूले महान् पर्व ‘क्रिसमस डे’ (येशु ख्रीष्टको जन्मदिन) मनउँदै छन् । नेपाललगायत विश्वभरका इसाई धर्मावलम्बीहरूले प्रेम, शान्ति र मुक्तिको उत्सवका रूपमा याे पर्व मनाउन लागेका हुन् ।
डिसेम्बर २५ का दिन इसाई धर्मावलम्बीहरूको महान् पर्व ‘क्रिसमस डे’ अर्थात येशु ख्रीष्टको जन्मदिनलाई इसाई समुदायले भव्य रूपमा मनाउने गर्दछन् । करिब २ हजार २५ वर्षअघि आजकै दिन इजरायलको वेथलेहेममा कुमारी मरियमको कोखबाट येशु ख्रीष्टको जन्म भएको धार्मिक विश्वास रहेको छ ।
नेपालमा क्रिसमसको अवसरमा प्रमुख पर्यटकीय गन्तव्यहरू ठमेल, बौद्ध, दरबारमार्ग तथा पोखरा र चितवनको सौराहामा विशेष चहलपहल बढेको छ भने ठाउँठाउमा रङ्गीचङ्गी बत्ती र आकर्षक ‘क्रिसमस ट्रि’ ले सिँगारिएका छन् ।
अहिले नेपालमा करिब ३० लाख इसाई धर्मावलम्बी र देशभर १३ हजारभन्दा बढी चर्च सञ्चालनमा रहेकाे नेपाल ख्रिष्टियन महासंघले जनाएकाे छ ।
यत ‘क्रिसमस डे’ का अवसरमा आज राष्ट्रपति रामचन्द्र पाैडेलले पर्वको माध्यमबाट विविध सांस्कृतिक पहिचान एवं धार्मिक आस्था बोकेका समुदायबीच आपसी सद्भाव, सहिष्णुता र ऐक्यबद्धताको भावना अभिवृद्धि हुने उल्लेख गर्दै शुभकामना सन्देश दिएका छन् ।
