नेपालको तराई नजिक रहेकाे मनसुनको न्यूनचापीय रेखाका कारण देशभरकाे माैसम साधारणतया बदली रहने जल तथा मौसम विज्ञान विभाग पूर्वानुमान महाशाखाले जनाएकाे छ । महाशाखाका अनुसार देशभरकाे माैसम बदली हुनुका साथै कोशी प्रदेशको पहाडी भागको एकदुई स्थानमा भारी वर्षाको सम्भावना रहेकाे बताइएकाे छ ।
त्यस्तै आज दिउँसो देशभर साधारणतया बदली रहने र देशका पहाडी भूभागका धेरै स्थान र मधेस प्रदेशलगायत अन्य प्रदेशका तराई भागका केही स्थानमा मध्यम वर्षाको सम्भावना रहेको पनि महाशाखाकाे भनाइ रहेकाे छ ।
त्यसैगरि आज राति देशभर पूर्णतया बदली रहने र मधेसलगायत कोशी, बागमती, गण्डकी र लुम्बिनी प्रदेशको पहाडी र तराई भागका धेरै स्थान र अन्य प्रदेशका पहाडी र तराई भागका केही स्थानमा मध्यम वर्षाको सम्भावना रहेकाे छ ।
त्यस्तै महाशाखाका अनुसार मधेस प्रदेशलगायत कोशी र बागमती प्रदेशको पहाडी र तराई भागका केही स्थानमा भारीदेखि धेरै भारी वर्षा हुनेछ भने गण्डकी प्रदेशका पहाडी र तराई साथै लुम्बिनी प्रदेशका तराईको एकदुई स्थानमा भारी वर्षाको सम्भावना रहेको जनाइएको छ ।
