सप्तरीमा प्रहरीले गाेली चलाउँदा एकजनाकाे मृत्यु भएकाे छ । गएराति सप्तरीको राजगढ गाउँपालिका-२, कमलपुरमा प्रहरीले गोली प्रहार गर्दा एकजनाको मृत्यु भएको हाे ।

राति मदिरा तस्करी रोक्न पुगेका प्रहरीले चलाएको गोली लागेर राजगढ-२, का ३६ वर्षीय लालु यादवको मृत्यु भएको हो । गोली लागेर घाइते भएका उनको उपचारको क्रममा गजेन्द्रनारायण सिंह अस्पताल राजविराजमा मृत्यु भएको हो ।

सीमा नजिकबाट ठूलो परिमाणमा मदिरा भण्डार गरी तस्करी भइरहेको सूचनाकाे अाधारमा ‘सर्च अपरेसन’ चलाउँदा स्थानीयवासीले अवराेध गरेपछि झडप भएको र स्थिति नियन्त्रणमा लिन प्रहरीले केही राउण्ड गोली चलाएको जिल्ला प्रहरी कार्यालय सप्तरीका प्रवक्ता डीएसपी जितेन्द्रकुमार बस्नेतले जनाएका छन् ।

झडपका क्रममा तिघ्रामा गोली लागेका यादवको मृत्यु भएको हाे भने एक प्रहरी पनि घाइते भएकाे बताइएकाे छ । प्रहरीले भारततर्फ तस्करी गर्न लागेको केही कार्टुन मदिरासमेत नियन्त्रणमा लिएको छ ।