देशभर मनसुनी वायुको प्रभाव रहेकाले देशको अधिकांश पहाडी भूभागमा बदली हुनुका साथै केहि स्थानमा भारी वर्षाकाे सम्भावना रहेकाे छ । मनसुनको न्यूनचापीय रेखा सरदर स्थानको उत्तरतर्फ नेपालको तराईमा अवस्थित रहेकाले देशभर मनसुनी वायुको प्रभाव रहेकाे हाे ।
मौसम पूर्वानुमान महाशाखाका अनुसार अहिले कर्णाली र सुदूरपश्चिम प्रदेशलगायत देशको पहाडी भूभागमा माैसम बदली भएकाे छ भने मधेश प्रदेशका एकदुई स्थानमा तथा बाँकी प्रदेशका थोरै स्थानमा मध्यम वर्षा भइरहेको छ । देशभर मनसुन सक्रिय रहँदा कोशी र सुदूरपश्चिम प्रदेशकामा भारी वर्षाको पनि सम्भावना रहेको छ ।
दिउँसो कोशी, लुम्बिनी, कर्णाली र सुदूरपश्चिम प्रदेश लगायत देशको अधिकांश पहाडी भूभागमा साधरणतया बदली रहनेछ । लुम्बिनी, कर्णाली र सुदूरपश्चिम प्रदेशलगायत कोशी प्रदेशको पहाडी भूभागका केही तथा बाँकी भूभागका थोरै स्थानमा मध्यम वर्षाको सम्भावना छ भने कोशी र सुदूरपश्चिम प्रदेशका एकदुई स्थानमा भारी वर्षाको सम्भावना रहेकाे महाशाखाले जनाएकाे छ ।
राति देशभर साधरणतया बदली रहनुका साथै कोशी र मधेश प्रदेशका केही तथा बागमती, गण्डकी र सुदूरपश्चिम प्रदेशका थोरै स्थान लगायत बाँकी प्रदेशका एक–दुई स्थानमा मध्यम वर्षाको सम्भावना रहेको छ भने कोशी प्रदेशको एकदुई स्थानमा भारी वर्षाको पनि सम्भावना रहेको बताइएकाे छ ।
