सुदूरपश्चिम प्रदेश सरकारले अछामको बान्नीगढी जयगढ गाउँपालिकास्थित जयगढ बजारमा गएराति भएको आगलागीबाट पीडित भएकालाई ५० लाख रुपैयाँ आर्थिक सहयोग गर्ने भएको छ ।
आज मुख्यमन्त्री तथा मन्त्रिपरिषद् कार्यालयमा बसेको प्रदेश विपद् जोखिम न्यूनीकरण तथा नियन्त्रण परिषद्को बैठकले जयगढका अग्नि पीडितलाई तत्काल ५० लाख रुपैयाँ आर्थिक सहयोग गर्ने निर्णय गरेको हो ।
सो रकम बान्नीगढी जयगढ गाउँपालिकालाई उपलब्ध गराइनेछ । जसअनुसार पालिकाले मानवीय सहायतासम्बन्धी मापदण्ड बनाएर पीडित परिवारलाई राहत उपलब्ध गराउने प्रदेश सरकारले जनाएको छ । प्रारम्भिक रिपोर्टको पूर्ण विवरण प्राप्त भएपछि थप सहयोग गर्नेसमेत बताइएको छ ।
जयगढ मुख्य बजारमा स्थानीय पुष्पराज शर्माद्धारा सञ्चालित आईएमई केन्द्रमा हिजो साँझ ग्याँस विस्फोट हुँदा ठूलो परिमाणमा धनमालको क्षति भएको छ । आगलागीबाट दुई दर्जन बढी घर जलेका छन् भने करोडौंको धनमाल नष्ट भएको छ । साँझ ७ बजेर २० बजेदेखि लागेको आगो बल्लतल्ल पाँच घण्टापछि मध्यराति नियन्त्रणमा लिइएको थियो ।
