राजसंस्था पुनःस्थापनाका लागि गठित संयुक्त जनआन्दोलन परिचालन समितिले अहिलेसम्म आन्दोलन नै शुरु नभएको बताएको छ । गत शुक्रबार कोटेश्वरस्थित तीनकुनेमा शान्तिपूर्ण प्रदर्शन गर्ने भनिएको राजावादीहरुको आन्दोलन हिंसात्मक बनेपछि अहिले आन्दोलन कमजोरी भएको टिकाटिप्पणी भइरहँदा समितिले यस्तो प्रतिक्रिया दिएको हो । समितिले आज विज्ञप्ति जारी गर्दै अहिलेसम्म आन्दोलन नै शुरु नभएको तर अब भने जनआन्दोलनका चरणबद्ध कार्यक्रम प्रचारात्मकदेखि अल्टिमेटम हुँदै अनिश्चितकालीन आम हड्ताल र अकुपाई नारायणहिटीसम्म गर्ने बताएको छ ।
‘हालसम्म राजसंस्था पुनःस्थापनाका लागि संयुक्त जनआन्दोलन समितिले आन्दोलनका कुनै कार्यक्रम सार्वजनिक गरेको छैन । यसपूर्व श्री ५ महाराजाधिराज सरकारको त्रिभुवन अन्तर्राष्ट्रिय विमानस्थलदेखि निर्मल निवाससम्मको कार्यक्रम स्वागत कार्यक्रम मात्र थियो, जनआन्दोलन थिए । त्यसैगरी, कोटेश्वर तीनकुनेमा आयोजित कार्यक्रम पनि आन्दोलन थिएन, अभियानका आफ्ना नीतिहरु घोषणा कार्यक्रम मात्र थियो । आन्दोलन कमजोर बनेको भन्ने देशविरोधी र निरंकुक्षतावादीहरुले सिर्जना गर्न खोजेको भाष्य मात्र हो । शुरु नै नभएको आन्दोलन कमजोर हुने भन्ने प्रश्न रहँदैन । खासमा अहिलेसम्म आन्दोलन घोषणा नै भएको छैन,’ विज्ञप्तिमा उल्लेख छ ।
आन्दोलनका कार्यक्रम घोषणा नै नभई सरकार आत्तिएर आफ्नो सबै शक्ति लगाएर आफ्ना अपराध लुकाउन षड्यन्त्रपूर्वक दोष अन्यत्र थोपर्दै दमनको नीतिमा उत्रेको समितिको ठहर छ । ‘हाम्रा सबै आन्दोलन शान्तिपूर्ण हुनेछन् । तथापि शान्तिपूर्ण रुपमा राष्ट्रगान गाइरहेको अवस्थामा अश्रुग्यास, गोली वर्षा भएको खण्डमा राष्ट्रिय झण्डाको शान बचाउनका लागि भने आवश्यक प्रतिरोधमा आन्दोलन स्वभावतः उत्रिने नै छ,’ समितिले भनेको छ । आन्दोलनलाई सभ्य, सुसंस्कृत, शान्तिपूर्ण र दमनविरुद्ध प्रभावकारी बनाउन मुलुकभर र प्रवासमा समेत समिति विस्तार गर्ने पनि जनाइएको छ ।
