थाइल्यान्डको पाँच दिने औपचारिक भ्रमणमा रहेका प्रधानमन्त्री केपी शर्मा ओली र थाइल्यान्डका वरिष्ठ व्यावसायीहरुको भेटवार्ता भएको छ । भेटका अवसरमा थाइल्यान्डका वरिष्ठ व्यावसायीहरुले नेपालमा लगानीका अवसरहरूको बारेमा चासो व्यक्त गरेका छन् ।
प्रधानमन्त्री ओलीले नेपाली व्यवसायी प्रतिनिधिमण्डलका सदस्यसहित आज बैंककमा थाइल्यान्डका वरिष्ठ व्यावसायीहरुसँग भेटवार्ता गरेका हुन् । प्रधानमन्त्री ओली थाइल्यान्डको औपचारिक भ्रमण र बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक)को छैटौं शिखर सम्मेलनमा भाग लिनका लागि मंगलबार थाइल्यान्डको बैंकक पुगेका थिए ।
थाइल्यान्डका वरिष्ठ व्यावसायीहरुसँगको भेटमा प्रधानमन्त्री ओलीले नेपालमा लगानीमैत्री नीति अवलम्बन गरिएको उल्लेख गर्दै उनिहरूलाई नेपालमा लगानी गर्न आग्रह गरेका थिए । त्यस्तै उनले नेपालमा पर्यटन, जलविद्युत्, कृषि, सूचना प्रविधि तथा पूर्वाधार विकासजस्ता क्षेत्रमा लगानीका अपार सम्भावना रहेको जानकारी गराउँदै थाइल्यान्डका लगानीकर्ताहरूलाई नेपाल भ्रमणका लागि निमन्त्रणा समेत दिएको बताइएको छ ।
थाइल्यान्डका व्यवसायीहरूले पनि नेपालको बढ्दो लगानी वातावरणप्रति चासो देखाउँदै, व्यापार तथा लगानी विस्तारका लागि थप अध्ययन गर्ने प्रतिबद्धता व्यक्त गरेका छन् । उनीहरूले विशेषगरी नेपालमा होटल तथा पर्यटन क्षेत्रमा लगानी गर्ने विषयमा चासो देखाएका हुन् भने उनीहरुले नेपालसँग आर्थिक सहकार्य बढाउन इच्छुक रहेको समेत बताएका थिए ।
त्यस्तै हिजो प्रधानमन्त्री ओलीले समकक्षी थाइल्यान्डका प्रधानमन्त्री पे थोङ थान शिनावात र थाइल्याण्डका राजा महा बजिरालोङ्कोर्नसँगबीच भेटवार्ता गरेका थिए ।
