सर्वोच्च अदालतले स्वास्थ्य तथा जनसंख्या मन्त्रालयकी अतिरिक्त सचिव डा.संगीता कौशल मिश्राको रिटमा अन्तरिम आदेश दिन अस्वीकार गरेको छ । न्यायाधीशद्धय मनोजकुमार शर्मा र टेकप्रसाद ढुङ्गानाको संयुक्त इजलासमा आज भएको सुनुवाईपछि अन्तरिम आदेश जारी नहुने आदेश दिइएको हो ।
उक्त आदेशसँगै अर्का अतिरिक्त सचिव डा.विकास सापकोटालाई स्वास्थ्य सचिवमा नियुक्त गर्ने सरकारको निर्णय यथावत रहने भएको छ । सर्वोच्चले मिश्राको रिटलाई अग्राधिकार दिने आदेश पनि जारी गरेको छ ।
गत फागुन २१ गतेको क्याबिनेट बैठकले अतिरिक्त सचिव देवकोटालाई सचिवमा बढुवा गर्ने निर्णय गरेको थियो । वरियताको पहिलो नम्बरमा रहेकी मिश्रलाई पाखा लगाउँदै दोस्रो नम्बरका देवकोटालाई सचिव नियुक्त गरेको थियो ।
वरियता मिचेर आफूभन्दा जुनियरलाई सचिव बनाएपछि स्वास्थ्यमन्त्री प्रदीप पौडेलको राजीनामा समेत मागेकी मिश्राले गत चैत १ गते सर्वोच्चमा रिट दायर गरेकी थिइन् ।
उनको रिटमाथि चैत ३ गते न्यायाधीश बालकृष्ण ढकालको एकल इजलासमा पहिलो सुनुवाई भएकोमा सरकारका नाममा कारण देखाऊ आदेश जारी भएको थियो । साथै, दुवै पक्षलाई छलफलका लागि बोलाइएको थियो ।
चैत ८ गते भएको अर्को सुनुवाईमा न्यायाधीशद्धय तिलप्रसाद श्रेष्ठ र महेश शर्मा पौडेलको संयुक्त इजलासले निर्णय फाइल झिकाउने आदेश दिएको थियो ।
