सगरमाथाको आधार शिविर क्षेत्रमा एकजना श्रमिकको मृत्यु भएको छ । आधार शिविर क्षेत्रमा दोलखाको गौरीशंकर गाउँपालिका-९, का ५५ वर्षीय लानिमा शेर्पाको मृत्यु भएको हो ।
शेर्पा जिल्लाको खुम्बु पासाङल्हामु गाउँपालिका-४, स्थित सगरमाथा बेस क्याम्पमा काम गर्दै आएका थिए । चैत १७ गते लेक लागेर बिरामी परेका शेर्पालाई घोडामार्फत खुम्जुङ स्वास्थ्य चौकी लैजाने क्रममा चैत १८ गते थुक्लामा मृत्यु भएको प्रहरीले जनाएको छ ।
जिल्ला प्रहरी कार्यालयले सोलुखुम्बुका अनुसार शवको कानुनी प्रक्रिया पूरा गरी मृतकको शव परीक्षणका लागि अल्टिच्युट हेलिकप्टरमार्फत टिचिङ अस्पताल काठमाडौँ लगिएको र शव परीक्षणपश्चात् चैत १९ गते उनका भतिजा पेमाछिरी शेर्पाले शव बुझेको बताइएको छ ।
शेर्पाको मृत्यु पछी घटनाको विस्तृत अनुसन्धान भइरहेको प्रहरीले जनाएको छ ।
