भाटभटेनी सुपरमार्केटका गार्ड दुलप्रसाद पराजुलीलाई पाँच लाख नगद सहित पुरस्कृत गरिएको छ । यहि चैत १५ गते भएको लुटपाट घटनामा उनले देखाएको बहादुरीको सम्मान गर्दै सुपरमार्केटका मालिक मीनबहादुर गुरुङले ५ लाख १ हजार १ सय ११ रुपैयाँ नगद, एक फूली र पाँच ग्रेड बढुवा प्रदान गर्दै पुरस्कृत तथा सम्मान गरेका हुन् ।

चैत १५ गते सुरक्षा गार्ड दुलप्रसाद पराजुलीले भाटभटेनी सुपरमार्केटमा लुटपाट हुँदा एक्लैले बहादुरीका साथ् लुटपाट गर्ने दर्जनौँ व्यक्तिलाई लिस्टीले कुट्दै त्यहाँबाट भगाएका थिए । पराजुलीले लुटपाट गर्ने व्यक्तिलाई लिस्टीले कुट्दै भगाएको उनको भिडियो अहिले सामाजिक सञ्जालमा भाइरल बनेको छ ।

पराजुली २२ वर्षदेखि भाटभटेनीमा कार्यरत रहेको बताइएको छ । पराजुलीसंगै अन्य कर्मचारीहरू सुरक्षा गार्ड सूर्य गिरी, दीपेश खड्का र सोमबहादुर भुजेललाई २५ हजार १ रुपैयाँ नगद र एक ग्रेड बढुवा प्रदान गरिएको छ भने ग्रोसरी सिनियर सुपरभाइजर सागर गुरुङले ५१ हजार १ सय ११ रुपैयाँको चेक र दुई ग्रेड बढुवा प्राप्त गरेका छन् ।

उक्त घटनामा लुटपाट र तोडफोडबाट सुपरमार्केटलाई करिब ८० लाख रुपैयाँ बराबरको क्षति भएको र ६४ लाख ८८ हजार रुपैयाँ बराबरको सामान लुटिएको बताइएको छ । उक्त घटना पछी पनि कर्मचारीहरू रातभर सरसफाइमा जुटेर भोलिपल्ट बिहानैदेखि सुपरमार्केट नियमित सञ्चालनमा ल्याएको छ ।