प्रधानमन्त्री केपी शर्मा ओली र थाइ समकक्षी पे थोङ् थान् सिनावातबीच आज भेटवार्ता हुँदैछ । थाइल्याण्डको औपचारिक भ्रमणका लागि हिँजाे त्यसतर्फ प्रस्थान गरेका प्रधानमन्त्री ओलीले समकक्षी पे थोङ्सँग भेटवार्ता गर्न लागेका हुन् ।
भेटवार्तापछि संस्कृति र पर्यटनका क्षेत्रमा सहकार्यसम्बन्धी सम्झौतापत्रमा हस्ताक्षर हुने परराष्ट्र मन्त्रालयले जनाएकाे छ । त्यस्तै दुई देशबीचका गैरसरकारी र व्यावसायिक संस्थाबीच विभिन्न छ सहमतिपत्र आदाप्रदान हुने समेत मन्त्रालयले जानकारी गराएकाे छ ।
दुई देशबीचकाे विभिन्न सम्झौतापछि दुवै प्रधानमन्त्रीले संयुक्त पत्रकार सम्मेलन गर्ने कार्यक्रम रहेकाे बताइएकाे छ । त्यसपछि प्रधानमन्त्री ओली आफ्नो सम्मानमा समकक्षी सिनावातले आयोजना गरेको दिवभोजमा सहभागी हुनेछन् ।
त्यसपछि प्रधानमन्त्री ओलीले थाइल्याण्डका राजा महा बजिरालोङकर्नसँग शिष्टाचार भेट गर्ने कार्यक्रम तय गरिएकाे छ । थाइल्याण्डका प्रधानमन्त्री सिनावातको मैत्रीपूर्ण निमन्त्रणामा नेपालका प्रधानमन्त्रीबाट पहिलोपटक थाइल्याण्डको औपचारिक भ्रमणमा त्यहाँ पुगेकाे प्रधानमन्त्री ओली २३ गते शनिबार स्वदेश फर्कने कार्यक्रम रहेकाे छ ।
