मुस्ताङ जिल्लाको लोमान्थाङ गाउँपालिकामा पाँच शैयाको आधारभूत अस्पताल भवन निर्माण भएको छ । उपल्लो मुस्ताङको लोमान्थाङमा संघीय सरकारको एकीकृत स्वास्थ्य पूर्वाधार विकास कार्यक्रमअन्तर्गत पालिकाको सहलगानीमा साढे दुईतले आधारभूत स्वास्थ्य भवन निर्माण गरिएको हो ।
उपल्लो मुस्ताङका नागरिकलाई स्वास्थ्य सेवामा पहुँच पुग्ने उदेश्यले आर्थिक वर्ष २०७८/७९ मा पूर्वाधार निर्माणको ठेक्का सम्झौता भएएको थियो । सम्झौता अनुसार आव २०८०/८१ जेठमा निर्माण सकिनुपर्नेमा कोरोना माहामारी र प्रतिकूल मौसमलगायतका कारण समयमै सम्पन्न हुन सकेको थिएन ।
हाल लोमान्थाङ–५, बजार नजिक २७ कोठे भवन निर्माण गरिएको छ । उक्त भवन ७ करोड १९ लाखको लागतमा निर्माण सम्पन्न गरिएको गाउँपालिकाका निमित्त कार्यालय प्रमुख विकास केसीले जानकारी दिएका छन् । प्रमुख केसीका अनुसार विशेषज्ञ चिकित्सकसहितको सेवा प्रवाह गर्ने उद्देश्यले शल्यक्रिया कक्ष, एक्सरे कक्ष, ल्याब कक्ष, प्रसूति कक्ष, फार्मेसी कक्षलगायत चिकित्सक तथा स्वास्थ्यकर्मी बस्ने आवास निर्माण गरिएको छ ।
अहिले भवन निर्माण सम्पन्न भएपनि उपकरण र जनशक्ति अभावमा सेवा सञ्चालन गर्न नसकिएको लोमान्थाङका अध्यक्ष टसीनर्बु गुरुङले जनाएका छन् । उनले सेवा सञ्चालन गर्न संघीय तथा प्रदेश सरकारको सहयोगको आवश्यक रहेको समेत बताएका छन् ।
