अमेरिकासँगको पुरानो सम्बन्ध समाप्त भएको क्यानडाका प्रधानमन्त्री मार्क कार्नीले बताएका छन् । मन्त्रिपरिषद् बैठकपछि सञ्चारकर्मीसँग कुरा गर्दै प्रधानमन्त्री कार्नीले अमेरिकासँगको सैन्य सुरक्षादेखि आर्थिक सम्बन्ध पनि सकिएको बताएका हुन् ।

प्रधानमन्त्री कार्नीले अमेरिकी राष्ट्रपति डोनाल्ड ट्रम्पको कर वृद्धिको नीतिले क्यानडाको अर्थतन्त्र प्रभावित भएकाले आर्थिक गतिविधि बढाउन धेरै प्रयास आवश्यक रहेको समेत बताएका छन् । यसअघि ट्रम्पले आयातित सवारी साधन र सवारी पार्ट्समाथि २५ प्रतिशत स्थायी कर लगाउने घोषणा गरेका थिए ।

लिबरल पार्टीका नेता समेत रहेका प्रधानमन्त्री कार्नीले १९६५ मा हस्ताक्षर भएको क्यानाडा–अमेरिका अटोमोटिव उत्पादन सम्झौता विपरित अहिले स्थायी कर लगाइएको बताएका छन् । त्यस्तै अर्को महिना हुने निर्वाचनमा आयात शुल्कहरूको सामना गर्न सक्ने गरि प्रधानमन्त्री कार्नीले आफ्नो अभियान योजनामा परिवर्तन गरेको उल्लेख गरेका छन् ।  

यता अमेरिकाले पहिले देखिनै क्यानाडाका सामानहरूमा २५ प्रतिशतको कर लागू गरेको छ भने सबै एल्युमिनियम र स्टील आयातमाथि पनि थप २५ प्रतिशत कर लगाएको छ । त्यस्तै नयाँ सवारी साधन ट्यारिफहरू २ अप्रिलबाट र पार्ट्समाथि मे वा त्यसपछि कर लागू हुने बताइएको छ ।