आज संघीय राजधानी काठमाडौंमा चार दलीय समाजवादी मोर्चाले गणतन्त्रको पक्षमा र राजावादीहरूले राजसंस्था पुनर्स्थापनाको पक्षमा प्रदर्शन गर्दैछन । गणतन्त्र पक्षधरहरूको प्रदर्शन प्रदर्शनीमार्ग भृकुटीमण्डप अगाडी गर्ने तयारी रहेको छ भने राजसंस्था पुनर्स्थापना पक्षधरको तिनकुनेमा प्रदर्शन गर्ने तयारी रहेको छ ।
आजको प्रदर्शनमा गणतन्त्रवादीहरूको प्रदर्शन चार दलीय समाजवादी मोर्चाले नेतृत्व गर्नेछ भने राजावादीहरूको प्रदर्शन राजसंस्था पुनर्स्थापना संयुक्त जनआन्दोलन समितिले गर्ने बताइएको छ । राजावादीहरूले गणतन्त्रको विरोध गर्दै पूर्वराजालाई सहभागी गराउन संयोजक नवराज सुवेदी, जनकमाण्डर दुर्गा प्रसाईंलगायतको नेतृत्वमा प्रदर्शन हुनेछ ।
त्यस्तै गणतन्त्र पक्षधर समाजवादी मोर्चामा आबद्ध नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी (नेसपा) र नेपाल कम्युनिष्ट पार्टीका कार्यकर्ताहरू विभिन्न स्थानहरूबाट जुलुस निकाल्दै भृकुटीमण्डप पुग्ने बताइएको छ ।
यता गणतन्त्र पक्षधर र राजावादीको दुईवटा ठूला प्रदर्शन हुने भएपछी प्रहरीले उच्च सुरक्षा सतर्कता अपनाउने निर्णय गरेको छ । जिल्ला सुरक्षा समितिले सम्भावित दुर्घटना रोक्न गणतन्त्र पक्षधर र विरोधी प्रदर्शनकारीलाई भेट्न नदिने विशेष रणनीति अपनाएको छ ।
काठमाडौं उपत्यकाभित्र ४ हजारभन्दा बढी प्रहरी परिचालन गर्दै जिल्ला सुरक्षा समितिले सम्भावित भिडन्त रोक्न विशेष सुरक्षा योजना बनाइसकेको बताइएको छ ।
