राष्ट्रिय मानव अधिकार आयोगले भोलि हुने प्रदर्शनमा मानव अधिकारप्रति संवेदनशील हुन सुरक्षा अधिकारीहरुलाई आग्रह गरेको छ । आयोगले प्रदर्शनमा उत्पन्न हुनसक्ने परिस्थितिको आँकलन गर्दै शान्ति सुरक्षाको व्यवस्था मिलाउँदा मानव अधिकारप्रति संवेदनशील हुन सरकार एवं सम्बद्ध सुरक्षा अधिकारीलाई आग्रह गरेको हो ।
प्रदर्शनका क्रममा दुवै पक्ष आमनेसामने हुने स्थिति सिर्जना भएमा त्यसबाट उत्पन्न हुनसक्ने परिस्थितिले शान्ति सुरक्षामासमेत चूनौती थप्ने अवस्थाप्रति चासो व्यक्त गर्दै आयोगले सुरक्षा व्यवस्थाबारे काठमाडौं र ललितपुरका प्रमुख जिल्ला अधिकारी, प्रहरी प्रमुखहरुसँग छलफल गरेकोसमेत जनाएको छ ।
‘छलफलका क्रममा सुरक्षा अधिकारीहरुले शान्ति सुरक्षाको अवस्थालाई व्यवस्थित गर्न उपत्यकाका सबै सुरक्षा निकायबीच समन्वय गर्दै प्रदर्शनकारीका प्रतिनिधिसँग समेत छलफल गरी सुरक्षा योजना तयार पारिएको बताउनुभएको छ,’ आयोगले भनेको छ, ‘आयोगका माननीय अध्यक्ष तपबहादुर मगरले शान्ति सुरक्षालाई व्यवस्थित गर्न र शान्ति सुरक्षाको प्रबन्ध मिलाउँदा मानव अधिकारका मूल्य मान्यतालाई आत्मसाथ गर्न निर्देशन गर्नुभएको छ ।’
आयोगले विभिन्न टोली बनाई भोलि हुने प्रदर्शनीको मानव अधिकारको कोणबाट अनुगमन गर्नेसमेत बताएको छ । साथै, आफ्नो विचार र अभिव्यक्ति स्वतन्त्रताको अधिकार प्रयोग गर्दा संविधान र राष्ट्रिय अन्तर्राष्ट्रिय कानूनमा उल्लेखित प्रावधानहरुको पालनामा संवेदनशील हुँदै अरुको अधिकारमा बाधा पर्नेतर्फ सचेत रहन र आफ्ना प्रदर्शनका कार्यलाई शान्तिपूर्ण बनाउन प्रदर्शनरत पक्षलाई आयोगको अपिल छ ।
