वैदेशिक रोजगारीमा माल्दिभ्स पठाइदिन्छु भन्दै ठगी गर्ने पक्राउ परेका छन् । आकर्षक तलबको प्रलोभनमा पारी माल्दिभ्स पठाइदिन्छु भन्दै रकम ठगी गरेको अभियोगमा रामेछाप खाँडादेवी गाउँपालिका-५ घर भएका ५१ वर्षीय हरि बहादुर रूचाल पक्राउ परेका हुन् ।

हाल भक्तपुरको मध्यपुर थिमी नगरपालिका-५ बस्ने रूचालले माल्दिभ्स पठाइदिन्छु भन्दै १ जना पीडितबाट २ लाख २४ हजार रुपैयाँ लिई सम्पर्कविहीन भएका थिए । सम्पर्कविहीन भएपछि पीडितले दिएको उजुरीको आधारमा रुचाललाई काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले सोमबार पक्राउ गरेको हो ।

प्रहरीले उनलाई काठमाडौँ महानगरपालिका-१२ बाट पक्राउ गरेर आवश्यक अनुसन्धान तथा कारवाहीको लागि वैदेशिक रोजगार विभाग ताहाचल काठमाडौँ पठाएको प्रहरीले बताएको  छ ।