नेपालमा आँखाकाे उपचार गर्न विभिन्न देशका नागरिकहरू आउने गरेका छन् । आँखा उपचारका लागि भारत, बङ्गलादेश, भुटानलगायत देशका नेपाल आउने गरेका हुन् ।
नेपाल नेत्रज्योति संघद्वारा सञ्चालित २८ वटा आँखा अस्पताल र २ सय २४ आँखा उपचार केन्द्रमा भारत, बङ्गलादेश, भुटानलगायत देशका आँखाका बिरामी उपचाराका लागि आउने गरेका हुन् । सन् २०२४ मा ९ लाख ७ हजार ७१ जना विदेशी नागरिकको आँखा परीक्षण तथा १ लाख ६२ हजार ८ सय ४५ जनाको शल्यक्रिया गरिएको संघका कार्यकारी निर्देशक डा शैलेशकुमार मिश्रले जानकारी गराएका छन् ।
त्यस्तै संघले सन् २०२४ मा ३२ लाख ६८ हजार ३४ जना आँखाका बिरामीको आँखा परीक्षण गरी २ लाख ५८ हजार ५ सय ७५ जनाको शल्यक्रिया गरेको बताइएकाे छ । संघकाे अस्पताल तथा विभिन्न बाह्य कार्यक्रममार्फत राष्ट्रिय तथा अन्तरराष्ट्रिय विकास साझेदार संस्थाको सहयोग तथा अस्पतालको आन्तरिक स्रोतबाट ३४ हजार ४ सय २५ जना आँखाका बिरामीको निःशुल्क शल्यक्रिया गरिएको थियाे ।
हालसम्म नेत्रज्योति संघले आफ्ना सञ्जालमार्फत नेपाली तथा अन्य देशका नागरिक गरी ४ करोड ६८ लाख ६८ हजार ६० जनाको उपचार तथा ५३ लाख ९२ हजार २ सय २४ जनाको आँखाको शल्यक्रिया गरेको समेत कार्यकारी निर्देशक मिश्रले जानकारी दिएका छन् ।
