आज बिहान कोइला बोकेको ट्रक त्रिशूलीमा खस्दा चालकको मृत्यु भएको छ । ट्रक मुग्लिन–नारायणगढ सडकखण्डको चौधकिलो भन्ने स्थानबाट त्रिशूलीमा खस्दा ट्रकका सहचालक घाइते छन् ।

बागमती प्रदेश ०३–००१ ख ४८७४ नम्बरको कोइला बोकेको ट्रक अनियन्त्रित भई त्रिशूलीमा खसेको थियो । उक्त दुर्घटनामा परी ट्रक चालक रौतहटका रामनारायण यादवको मृत्यु भएको र सहचालक रौतहटकै असुन्द्र कुमार यादव घाइते भएको चितवन प्रहरीले जनाएको छ ।

दुर्घटनाको खबर पाए लगतै इलाका प्रहरी कार्यालय जुगेडीबाट प्रहरी नायब निरीक्षक ठाकुर प्रसाद पनेरु नेतृत्वको टोली उद्धारको लागि खटिएको थियो । टोलीले चालक र सहचालकलाई उद्धार गरी भरतपुर अस्पताल पठाएको थियो ।