ताप्लेजुङ जिल्लाको पाथीभरा मन्दिरमा केबुलकार निर्माणको विरोध गर्दै आएको मुकुम्लुङ संरक्षण अन्तरदलीय पार्टीहरूले गरेको बन्दका कारण पूर्वी जिल्लाको जनजीवन प्रभावित भएको छ । माघ २०-२१ गते आवहान गरेको बन्दको कारण पूर्वी जिल्लाको जनजीवन प्रभावित भएको हो ।
केबुलकार निर्माणको विरोध गर्दै माघ २०-२१ गते अरुणपूर्वका ९ जिल्ला (ताप्लेजुङ, पाँचथर, इलाम, झापा, मोरङ, सुनसरी, धनकुटा, तेह्रथुम र संखुवासभा) बन्दको आह्वान गरिएको छ ।
बन्दका कारण कोशी प्रदेशका पहाडी जिल्लामा सवारी साधन ठप्प बनेका छन् ।
त्यस्तै बन्दका कारण कोशी राजमार्ग धरानबाट धनकुटा हुँदै तेह्रथुम र संखुवासभा जाने तथा पहाडी क्षेत्रबाट तराई जाने सवारी साधन सञ्चालन हुन सकेका छैनन् । बन्दकर्ताले धार्मिक आस्थामा खलल पुर्याउने गरी व्यापारिक घरानालाई केबुलकार बनाउन दिएको भन्दै विरोध गर्दै आएका छन् ।
यता केही दिनअघि प्रहरीसँगको झडपमा ३ जना गोली लागी गम्भीर घाइते भएपछि आन्दोलन चर्किदै गएको छ । उनीहरुले केबुलकार निर्माण रोक्नुपर्ने, प्रहरीको गोली लागि घाइते भएकाहरुको आजीवन जीवन निर्वाहको व्यवस्था गर्नुपर्ने र यसअघ गिरफ्तारीमा परेकालाई विनाशर्त रिहाइ गर्नुपर्ने माग राखी दुई दिन बन्द आह्वान गरेका हुन् ।
