बुटवलको सुप्रिम सहकारीको रकम अपचलन गरेको आरोपमा राष्ट्रिय स्वतन्त्र पार्टी (रास्वपा) का सभापति रवि लामिछाले रुपन्देही जिल्ला अदालतमा एक करोड धरौटी बुझाएका छन् । लामिछाले आइतबार बैंक ज्ञारेन्टीमार्फत धरौटी रकम बुझाएका हुन् ।

बैंक ज्ञारेन्टीमार्फत धरौटी बुझाएर लामिछानेले रिहा भएका छन् । यसअघि बुटवलको सुप्रिम सहकारीमा रकम अपचलन गरेको आरोप लागेका रविलाई रुपन्देही जिल्ला अदालतले एक करोड धरौटी माग गरेको थियो । गत बुधबारदेखि भएको बयान, थुनछेक र जवाफी बहसपछि आइतबार न्यायाधीश प्रह्लादकुमार योगीको इजलासले सो आदेश गरेको हो ।

यसअघि सहकारी ठगी, संगठित अपराध  तथा सम्पत्ति शुद्धीकरणको मुद्दामा कास्की जिल्ला अदालतले लामिछानेलाई ६५ लाख रुपैयाँ धरौटीमा रिहा गर्न आदेश दिएको थियो । लामिछाने २०८१ कतिक २ कात्तिकदेखि कास्की प्रहरीको हिरासतमा थिए ।

कास्कीबाट रिहा भएका लामिछानेलाई काठमाडौँ जिल्ला अदालतले स्वर्णलक्ष्मी सहकारी ठगी मुद्दाको थुनछेक बहसपछि न्यायाधीश माधवप्रसाद अधिकारीको इजलासले ६० लाख धरौटी लिएर छाड्न आदेश दिएको थियो ।