गुल्मीमा बस गुड्ने क्रममा ढोकाबाट खसेर एक यात्रु महिलाको मृत्यु भएको छ । बुटवलदेखि तम्घास हुँदै अर्खबाङ्ग जाँदै गरेको लु १ ख ५७३६ नम्बरको बसबाट खसेर घाइते भएकी इस्मा गाउँपालिका-५ रातामाटाकी ३९ वर्षीया शान्ति कुमालकाे उपचारकाे क्रममा गुल्मी अस्पतालमा मृत्यु भएको जिल्ला प्रहरी कार्यालयले जनाएकाे छ ।
भाडाको विषयमा मृतक महिलासँग बसका सहचालकको सामान्य विवाद हुँदा बस गुड्ने क्रममा ती महिला ढोकामा झुण्डिन पुगेकाे र ढोकाबाट खसेकाे जिल्ला प्रहरी कार्यालय गुल्मीका प्रमुख प्रहरी उपरीक्षक राजन भुजेलले जानकारी दिएका छन् ।
गुल्मीको तम्घास-छल्दी-सिमलटारी सडकखण्ड अन्तर्गतको धनार्जीमा बुटवलदेखि तम्घास हुँदै अर्खबाङ्ग जाँदै गरेको बसमा मृतक महिलासँग बसका सहचालकको विवाद भएको बताइएकाे छ ।
