नेपाली विद्यार्थीले विदेशी शैक्षिक कार्यक्रमका लागि चालु आर्थिक वर्षको पाँच महिनामा ४७ अर्ब ३४ करोड बाहिर लगेका छन् । नेपाल राष्ट्र बैंकले सार्वजनिक गरेको पछिल्लो विवरणअनुसार चालु आर्थिक वर्षको पाँच महिनामा विदेशी शैक्षिक कार्यक्रम अन्तर्गत उक्त रकम बाहिरिएकाे हाे ।
अघिल्लो वर्षको सोही अवधिमा यस्तो आय ३४ अर्ब १२ करोड रहेको थियो । अहिले देशभित्रै सुविधासम्पन्न विश्वविद्यालय र शैक्षिक संस्थानहरू सञ्चालनमा रहेता पनि विदेशमा अध्ययन गर्न चाहने विद्यार्थीको संख्या दैनिक बढीरहेकाे छ ।
नेपाल राष्ट्र बैंकले सार्वजनिक गरेको विवरणअनुसार भ्रमण व्यय १२.२ प्रतिशतले वृद्धि भई ८५ अर्ब एक करोड पुगेको छ । जसमध्ये शिक्षातर्फको व्यय रू ४७ अर्ब ४१ करोड रहेको छ भने अघिल्लो वर्षको सोही अवधिमा भ्रमण व्यय ७५ अर्ब ७३ करोड रहेको थियो ।
गएकाे मङ्सिर मसान्तसम्म खुद सेवा आय ४० अर्ब ७१ करोडले घाटामा रहेको छ भने अघिल्लो वर्षको सोही अवधिमा खुद सेवा आय २६ अर्ब ५५ करोडले घाटामा रहेको थियो । सेवा खाताअन्तर्गत समीक्षा अवधिमा भ्रमण आय ३.१ प्रतिशतले वृद्धि भई ३५ अर्ब १९ करोड पुगेको बताइएकाे छ ।
