काठमाडौंको शंखरापुर नगरपालिका– ३ लप्सीफेंदीमा नेपाल विद्युत् प्राधिकरणले बनाइरहेको सबस्टेसन र टावरको काम रोक्न माग गर्दै आएका स्थानीय र प्रहरीबीच झडप भएको छ । सबस्टेसन र टावरको काम रोक्न माग गर्दै आएका स्थानीय र प्रहरीबीच गएराति झडप भएकाे हो ।
गएराति भएकाे झडपमा संलग्न भएको भन्दै प्रहरीले १७ जनालाई नियन्त्रणमा लिएको थियाे भने नियन्त्रणमा लिएको ४ जनालाई छाडेको बताइएकाे छ । १३ जना बौद्ध प्रहरीको हिरासतमा रहेका छन् । काठमाडौं प्रहरीका एसपी नवराज अधिकारीका अनुसार काममा अवरोध गरेकाले १३ जनालाई हिरासतमा लिइएको जनाइएकाे छ ।
सबस्टेसन र टावर निर्माणका लागि विहीबार बिहान करिब ११ बजे डोजर पुग्दा स्थानीयले ढुंगा प्रहार गरेर अवरोध गरेका थिए । त्यसपछि नेपाल प्रहरी र सशस्त्र प्रहरीको टोलीले विहीबार राति ९ बजेसम्म पनि धरपकड गरेको स्थानीयको आरोप छ ।
उक्त स्थानमा नेपाल विद्युत प्राधिकरणले तामाकोशी तथा सुनकोशी नदी र तिनका सहायक खोलाहरुमा निर्माण भएका तथा हुने जलविद्युत आयोजनाको विद्युत काठमाडौं उपत्यकामा ल्याउन र स्थानीय रुपमा आपूर्तिका लागि सबस्टेसन निर्माण गर्न लागेको हाे । तर स्थानीयले बस्तीको बीचमा सबस्टेसन निर्माण नगर्न माग गर्दै आएका छन् ।
यसअघि २०८० साल मंसिरमा पनि साेही स्थानमा स्थानीयसँग झडप हुँदा सशस्त्र प्रहरीका डिएसपी देवराज राईसहित तीन जना सुरक्षाकर्मी घाइते भएका थिए ।
