एक महिनाकाे अन्तरालमा त्रिभुवन अन्तर्राष्ट्रिय विमानस्थलमा साढे ८ लाखभन्दा बढी यात्रुकाे आवागमन भएकाे छ । त्रिभुवन विमानस्थल नागरिक उड्डयन कार्यालयकाे तथ्यांक अनुसार सन् २०२४ नोभेम्बर महिनामा ८ लाख ५१ हजार २५ यात्रु आवागमन भएको हाे ।
उक्त अवधिमा साढे १२ हजारभन्दा बढी उडान-अवतरण भएको पनि उड्डयन कार्यालयकाे तथ्यांकमा उल्लेख गरिएकाे छ । जसअनुसार नोभेम्बर महिनामा १२ हजार ५ सय २५ उडान–अवतरण भएको थियाे ।
उक्त दुवै संख्या आन्तरिक र अन्तर्राष्ट्रियतर्फको हो । नोभेम्बरमा अन्तर्राष्ट्रियतर्फ ४ लाख २९ हजार ८ सय ४७ यात्रु आवागमन भएको थियाे भने कुल २ हजार ६ सय ४८ उडान-अवतरणबाट १ लाख ९९ हजार ४ सय ९५ यात्रु आगमन भएको थियाे । उक्त अवधिमा २ लाख २९ हजार ७ सय ६३ यात्रु बाहिरिएका छन् ।
त्यस्तै आन्तरिकतर्फ ४ हजार ९ सय ३३ अवतरण हुँदा २ लाख १९ हजार ४ सय ३० र ४ हजार ९ सय ४४ उडानबाट २ लाख १ हजार ७ सय ४८ यात्रु बाहिरिएका थिए । कुल आन्तरिक यात्रु आवागमन संख्या ४ लाख २ हजार १ सय ७८ पुगेको उड्डयन कार्यालयकाे तथ्यांकमा उल्लेख गरिएकाे छ ।
