जाजरकोटमा जीप दुर्घटनामा परि ५ जनाकाे मृत्यु भएकाे छ । राति ११ बजे नलगाड नगरपालिका-५ कालीबाटीबाट वडा नम्बर ३ करुवा जाँदै गरेको ग ३ च ९८४५ नम्बरको बोलेरो जीप दुर्घटना भएकाे थियाे ।  

जाजरकोटकाे कैना-कड्के सडकअन्तर्गत बिरखोला नजिक जीप दुर्घटनामा दूधे बालकसहित ५ जनाको मृत्यु भएको जिल्ला प्रहरी कार्यालय जाजरकोटले जनाएकाे छ । दुर्घटनामा परी नलगाड नगरपालिका-३ करुवाका ३१ वर्षीय जीप चालक ईन्द्रजित थापा, ६५ वर्षीया शिला पुन, ३३ वर्षीया शारदा थापा, १७ वर्षीया लक्ष्मी पुन रोका र लक्ष्मीका एक महिनाका छोरा आलोचन रोकाको मृत्यु भएको बताइएकाे छ ।

दुर्घटनामा परि नलगाड नगरपालिका-३ का १९ वबर्षीय जनक थापा र २१ वर्षका जीवन विक २ जना घाइते भएकाेमा थापाको उपचार भइरहेको छ भने जीवन विक सामान्य उपचारपछि घर फर्किएकाे प्रहरीले जनाएकाे छ । सडकबाट करिब ८०० मिटर तल खसेर दुर्घटना ग्रस्त भएकाे जीपमा ७ जना सवार रहेका थिए ।