जाजरकोटकाे भेरी नगरपालिका-१० नुवागाउँमा बोलेरो दुर्घटना हुँदा २ जनाको मृत्यु भएको छ । जाजरकोटकाे मध्यपहाडी लोकमार्ग अन्तर्गतकाे उक्त राजमार्गमा प्रदेश ३-०१-०२३ च ४७१९ न बोलेरो बुधबार बेलुकी ८ बजेतिर दुर्घटना भएकाे हाे ।
कार्कीगाउँबाट कुदु तर्फ जाँदै गरेकाे उक्त बाेलेराे दुर्घटना हुँदा मध्यपहाडी लोकमार्गमा कार्यरत दुईजनाको मृत्यु भएको प्रहरीले जानकारी दिएकाे छ । दुर्घटनामा बोलेरो चालक कैलालीका २४ वर्षीय मनोज केसी र जुम्लाका २३ वर्षीय मिथुम हमालको मृत्यु भएको जिल्ला प्रहरी कार्यालयका सूचना अधिकारी प्रहरी निरीक्षक हरिराम डाँगीले बताएका छन् ।
प्रहरीका अनुसार बाेलेराे सडकबाट करिब ७०० फिट तल खसेको बताइएको छ । उक्त दुर्घटनामा घाइते २३ वर्षीय कमल चौधरीलाई जिल्ला अस्पतालमा सामान्य उपचारपछि नेपालगञ्ज मेडिकल कलेजमा लगिएको छ ।
