दाङको तुलसीपुर उपमहानगरपालिका-१८ बिजौरीको डाँडागाउँनजिकै बस दुर्घटना हुँदा २१ जना यात्रु घाइते भएका छन् । आज बिहान घोराहीबाट तुलसीपुर तर्फ जाँदै गरेको बस दुर्घटना हुँदा बसमा सवार २१ जना यात्रु घाइते भएका हुन् ।
बस दुर्घटनाका घाईते मध्ये ३ जना गम्भीर रहेको प्रहरीले जनाएको छ । रा १ ख १३८२ नम्बरको बस घोराही-तुलसीपुर सड़क अन्तर्गत तुलसीपुर उपमहानगरपालिका-१८ बिजौरीको डाँडागाउँनजिकै दुर्घटना भएको हो ।
दुर्घटनाका घाइतेहरुको राप्ती प्रादेशिक अस्पताल तुलसीपुरमा उपचार भइरहेको जिल्ला प्रहरी कार्यालय दाङका डिएसपी इश्वर थापाले जानकारी दिएका छन् । घटनाको अनुसन्धान भइरहेको र बस चालक घोराही-१० का मनोज चौधरी फरार रहेको प्रहरीले जनाएको छ ।
