आज बिहान ७ बजे भक्तपुरको गठ्ठाघर चोकमा ट्रकले स्कुटरलाई ठक्कर दिँदा एक महिलाको मृत्यु भएको छ । भक्तपुरबाट काठमाडौंतर्फ आउँदै गरेको ना ८ ख २३११ नम्बरको ट्रकले बागमती प्रदेश ०२–०३८ प ४४०१ नम्बरको स्कुटरलाई ठक्कर दिँदा घाइते भएकी महिलाकाे उपचारको क्रममा मृत्यु भएकाे हाे ।
ट्रकको ठक्करबाट घाइते भएकी भक्तपुर नगरपालिका-५ की ४१ वर्षीया नवीना देउलाको मृत्यु भएको प्रहरी वृत्त ठिमीले जनाएको छ । ट्रकको ठक्करबाट घाइते देउलाको उपचारको क्रममा भक्तपुर इन्टरनेशनल अस्पतालमा आज बिहान पौने ८ बजे मृत्यु भएको हो ।
दुर्घटनामा नवीनाका श्रीमान् जिते देउला घाइते भएकाे र उनको अवस्था सामान्य रहेको प्रहरीले जनाएको छ । ठक्कर दिने ट्रक चालक र ट्रकलाई प्रहरीले नियन्त्रणमा लिएको छ ।
