ललितपुरको बालकुमारीस्थित एक घरमा आगलागी हुँदा पसलहरुमा क्षति पुगेको छ । बालकुमारीस्थित सीसीआरसी कलेज नजिक स्वाभिमान श्रेष्ठको दुई तले घरमा एक्कासी विद्युत् चुहावट भएर आगलागी हुँदा फार्मेसी, जुम्बा डान्स सेन्टर र पसलहरुमा क्षति पुगेको हाे ।
ललितपुर प्रहरीका अनुसार आगलागीबाट घरको पहिलो तलामा रहेकाे ‘डगेरा फार्मेसी’ जलेर नष्ट भएको जनाइएको छ । आगलागीबाट श्रेष्ठको घरसँगैको एउटा पान पसल र मःम पसल पनि जलेर नष्ट भएको छ भने सँगैको ‘जुम्बा डान्स सेन्टर’ पनि जलेर नष्ट भएको बताइएकाे छ ।
पाँचवटा दमकलको सहयोगमा एक घण्टापछि आगो निभाइएको थियो । आगो निभाउन काठमाडौंका तीन र ललितपुरका दुईवटा दमकलका साथै प्रहरी टोली परिचालन गरिएको थियो भने आगलागीबाट भएको क्षतिको विवरण यकिन भइनसकेकाे प्रहरीले बताएकाे छ ।
