आज बिहान ८ बजे बागलुङको जैमिनी नगरपालिकामा ‘पिकअप भ्यान’ दुर्घटना हुँदा ५ जनाको मृत्यु भएको छ । जैमिनी नगरपालिका-७ जैदीको व्यार्थला नजिकै भएको दुर्घटनामा ५ जनाको मृत्यु भएको हो ।
ग २ च ९२४७ नम्बरको भ्यान जैमिनी नगरपालिका-८ छिस्तीबाट जिल्ला सदरमुकाम बागलुङ बजारतर्फ आउँदै गर्दा बिहान दुर्घटना भएको हो । जिल्ला प्रहरी कार्यालयका प्रहरी निरीक्षक एवं सूचना अधिकारी केशव थापाका अनुसार दुर्घटनामा मृत्यु हुनेमा जिप चालक बागलुङ जैमिनी-८ केवईका ३८ वर्षीय महेन्द्र पुन, सोही ठाउँकी २० वर्षीया रश्मी श्रीष, ५० वर्षीया नन्दकली पुन, १७ वर्षीय निरज श्रीष र ७५ वर्षका कुल प्रसाद श्रीष रहेका छन् ।
६ जना सवार भ्यानमा गम्भीर घाइते भएका १ जनाको जीवितै उद्धार गरिएको जिल्ला ट्राफिक प्रहरी कार्यालयले जानकारी दिएको छ । घाइते बागलुङ जैमिनी -८ का ४५ वर्षीय गंगा बहादुर श्रीषलाई थप उपचारका लागि धौलागिरी अस्पताल बागलुङ ल्याइएको छ ।
