झापाको दमक नगरपालिका–९, का देशु भनिने यामु निरौलाको हत्या प्रकरणमा संलग्नलाई कारबाही गर्न स्थानीय राजनीतिक दलहरुले प्रहरीसँग माग गरेका छन् ।
नेपाली काँग्रेस, नेकपा एमाले, नेकपा माओवादी केन्द्र, राष्ट्रिय प्रजातन्त्र पार्टी (राप्रपा), राष्ट्रिय स्वतन्त्र पार्टी (रास्वपा), एकीकृत समाजवादी, जसपालगायत दमक नगरका नेतृत्वले निरौलाको हत्यामा संलग्नलाई कारबाही गर्न माग गरेका हुन् ।
उनीहरुले अलग–अलग विज्ञप्ति निकालेर घटनाको सुक्ष्म अनुसन्धान गरी कारबाही प्रक्रिया अघि बढाउन जिल्ला प्रहरी कार्यालय, झापाको ध्यानाकर्षण गराएका छन् । घटना अत्यन्तै गम्भीर प्रकृतिको रहेको भन्दै दलहरुले दोषीलाई पक्राउ गरी कानूनी दायरामा ल्याउनुपर्ने माग राखेका छन् ।
गत कात्तिक ६ गते दमक–३, स्थित मावा पुलनजिकै दिनदहाडै जग्गा उपयोगको विषयलाई लिएर दुई पक्षबीच चर्काचर्कीसहित कुटपिट र ढुंगा प्रहार हुँदा निरौलाको ज्यान गएको थियो ।
घटना भएको करिब एक साता हुन लाग्दासमेत प्रहरीले कुटपिटमा संलग्नलाई पक्राउ पनि नगरेको भन्दै मृतक निरौलाका परिवार तथा आफन्त निरन्तर प्रदर्शनमा छन् । उनीहरुले शनिबार इलाका प्रहरी कार्यालय दमकको गेटमै दायर बालेर विरोध समेत जनाएका थिए ।
