हवाई यात्रुको चाप बढेपछी नेपाल वायुसेवा निगमले काठमाडौं–भैरहवा–काठमाडौंका लागि ठूलो विमानबाट उडान गर्ने भएको छ । बाढीपहिरोका कारण देशभर सडक संरचनामा क्षति पुगेपछि नेपालीको मुख्य चाड बडादशैँमा नागरिकको सुविधालाई मध्येनजर गर्दै निगमले काठमाडौं-भैरहवा-काठमाडौं उडान गर्न लागेको हो ।
निगमले असोज २४ गते फूलपातीका दिन उडान गर्ने जनाएको छ भने त्यसदिन काठमाडौंबाट बिहान ११ : 00 बजे भैरहवातर्फ हुने उडानको एकतर्फी भाडादर सात हजार रुपैयाँ तोकिएको छ । त्यस्तै सोही दिन १२ : ३0 बजे भैरहवाबाट काठमाडौं उडान गर्ने त्यसको भाडा ३ हजार ८ सय कायम गरिएको निगमले जनाएको छ ।
उक्त न्यारो बडी विमानमा १ सय ५८ जना यात्रुले उडान गर्न सक्ने र निगमले यात्रुहरुले निगमको आन्तरिक बिक्री कार्यालय, निगमको वेवसाइट www.nepalairlines.com.np वा आफ्नो मोबाइलबाट अनलाइन टिकट लिन सक्ने समेत जनाएको छ ।